ఐఫోన్ కొనడం ఎంతో ఈజీ.. త్వరలో నెలవారీ చెల్లింపుల పథకం!

ఐఫోన్, ఐప్యాడ్, ఇతర హార్డ్ వేర్ ఉత్పత్తులను సబ్ స్క్రిప్షన్ విధానంలో యాపిల్ విక్రయించనుందని బ్లూంబర్గ్ కథనం ద్వారా తెలుస్తోంది. సబ్ స్క్రిప్షన్ సర్వీస్ ఇంకా అభివృద్ధి దశలో ఉందని, ఈ ఏడాది ద్వితీయ భాగంలో దీన్ని ప్రారంభించనుందని తెలుస్తోంది. ఈ విధానంలో కొనుగోలు చేసిన కస్టమర్లు నెలవారీ యాప్ ఫీజును చెల్లించాల్సి ఉంటుంది.  టెలికం కంపెనీలకు నెలవారీగా చందా చెల్లించినట్టుగా.

ఇప్పటి వరకు సబ్ స్క్రిప్షన్ సేవలు యాపిల్ మ్యూజిక్, ఐ క్లౌడ్, యాపిల్ టీవీ ప్లస్, యాపిల్ ఫిట్ నెస్ ప్లస్, యాపిల్ ఆర్కేడ్ వంటి సాఫ్ట్ వేర్ సర్వీసులకే అమల్లో ఉన్నాయి. ఒక ఐఫోన్ ధరను 12 నుంచి 24 నెలలకు వసూలు చేసే మాదిరిగా ఈ సబ్ స్క్రిప్షన్ విధానం ఉండదని బ్లూంబర్గ్ పేర్కొంది. ఏటా విడుదల చేసే కొత్త ఐఫోన్ సిరీస్ కు మారిపోవచ్చు. పాత డివైజ్ తీసుకుని కొత్త మోడల్ డివైజ్ ను యాపిల్ అందిస్తుంది. నెలవారీగా కస్టమర్ ఎంత చెల్లించాలన్నది కంపెనీ నిర్ణయిస్తుంది. ఈ సేవను యాపిల్ ఆవిష్కరిస్తే మరిన్ని వివరాలు తెలిసే అవకాశం ఉంటుంది.