What is class consciousness..?
వర్గ స్పృహ అనగానేమి?
ఇది త్రేతాయుగం నాటి కథ
అప్పట్లో ఒక కమ్యునిస్టు బ్రాహ్మణ రచయిత నవల రాద్దామని కూర్చున్నాడు. అందులో పాత్రలు ఒక భూస్వామి, ఒక పాలేరు . ఒక భూస్వామి భార్య … ఒక పాలేరు భార్య ఇవీ పాత్రలు నవల చాలా హుషారుగా రాసేస్తున్నారు రచయితగారు … నవల పూర్తయ్యింది. రాసిన నవలను ఓ సారి మార్క్స్ పటం ముందుంచి మనసులోనే నమస్కరించి ఆశీస్సులివ్వమని బలంగా కోరుకుని ఎర్ర నవలలు అచ్చేసే పబ్లిషర్ దగ్గరకి వెళ్లారు.
పబ్లిషరుగారు నవలను స్వీకరించి రచయితగారికి ఎర్ర టీ తెప్పించి తాగించి మరీ సాగనంపారు.
ఏ విషయం త్వరలోనే తెలియచేస్తానని హామీ ఇచ్చి ఓ పదిహేను రోజులు గడిచాక రచయితగారికి ఎర్ర పబ్లిషర్ నుంచీ ఉత్తరం వచ్చింది. కవరు ఎర్రగా ఉండడంతో అది ఎర్ర పబ్లిషరు నుంచే అని ఉత్తరం పోస్ట్ మ్యాన్ చేతిలో ఉండగానే మన రచయితగారు గుర్తు పట్టి ఎదురెళ్లి మరీ స్వీకరించారు.
ఆ ఉత్తరం లో సారాంశమేమంటే
రచయితగారు కమ్యునిష్టే అయినప్పటికీ పైగా బ్రాహ్మణ కులానికి చెందిన కమ్యునిస్టు రచయితే అయినప్పటికిన్నీ
నవలలో అన్యవర్గ భావజాలం అధికంగా కనిపిస్తూంది .
ముఖ్యంగా సంభాషణల్లో … రచయిత వర్గ స్వభావం చాలా బలంగా కనిపిస్తోంది .
ఎంచుకున్న కథ వర్గ రహిత సమాజాన్ని కాంక్షించేదిగానే నడిచినప్పటికీ
నవల సాగిన తీరు దీనికి పూర్తి భిన్నంగా ఉన్నదని బావించడం చేత ఈ నవలను ప్రచురణకు స్వీకరించడం లేదని తెలియచేయడానికి చింతిస్తున్నాం
వర్గ స్పృహ పుష్కలంగా ఉన్న ఈ రచయిత భవిష్యత్తులో ఈ లోపాన్ని సవరించుకుని వర్గ పోరాటానికి దోహదపడే సాహిత్యం పుంఖానుపుంఖాలుగా సృష్టిస్తారనే భరోసా మాత్రం ఈ నవల ద్వారా మాకు కలిగింది..
ఆ నమ్మకాన్ని నిలబెట్టుకుంటారని ఆశిస్తూ సెలవు
ఇది మొత్తంగా ఉత్తరంలో పబ్లిషరుగారు వ్యక్తీకరించిన అంశాలు
అసలెక్కడ తేడా జరిగిందో కనుక్కోమని తమ ఏరియా పార్టీ నాయకుడ్ని కోరారు రచయితగారు … ఆయనా బ్రాహ్మడే.
ఆయనకీ ఈ విషయం చాలా ఆధ కలిగిచింది ..
బ్రాహ్మడు పైగా తన శాఖ వాడైన రచయితగారికి ఇలా జరగడం కలిగించిన బాధతో తాడో పేతో తేల్చుకుందామని ఎర్ర పబ్లిషరు దగ్గరకి పోయాడు. ఏమిటయ్యా సంగతని నిలదీశాడు.
ఎర్ర పబ్లిషరు చెప్పాడు .
అయ్యా … రచయిత గారి నవల గురించి … ఆయన ఎంచుకున్న ప్లాటు మంచిదే..
కాకపోతే సంభాషణల్లో వర్గ సామరస్య సిద్దాంత ధోరణి వ్యక్తమయ్యింది ..అది ప్రమాదకరం కనుక ప్రచురణ నిరాకరించాను తప్ప వర్గ పోరాట అనుకూల సాహిత్యమైతే ఈ పాటికి అచ్చేసేసి ఉందును కదా … అన్నాడు.
ఏమిటా వర్గ సామరస్య ధోరణి వ్యక్తమయ్యే డైలాగులు చెప్పు నేనూ వింటాను అన్నారు నాయకుడుగారు.
చూడండి … తన పాలేరుతో భూస్వామి ఎలా మాట్లాడుతున్నాడో చూడండి …
ఏమండీ మహారాజశ్రీ పాలేరుగారూ … మీరు నిన్నటికల్లా మొత్తం ఒడ్లన్నీ దంపి బియ్యం సిద్దం చేసి ఉంచుతాం అన్నారు కదూ… మరి ఆ పని తమరు చేయకపోతే మరెవరు చేస్తారు …. తమరి కుమారులు శ్రీశ్రీశ్రీ పిల్ల పాలేరుగారైనా దంచి తీరాలి కదా
ఇట్టా మాట్లాడతాడండి …
ఇక పాలేరెలా మాట్లాడతాడో తెల్సా?
ఓరీ భూస్వామీ … దుర్మార్గుడా దోపిడీ కుక్కా … నీకు రోజులు దగ్గర పడ్డాయిలే … పల్లెలు మేలుకుంటున్నాయిరా … నీ దుర్మార్గాన్ని అంతం చేసి తీరుతాయిరా … కాచుకో రైతు దెబ్బ … ఇట్టా సాగుతాయండి …ఇది చదువుతా ఉంటే … పాలేరులు దుర్మార్గులనీ .. భూస్వాములు మంచి మన్నన ఉన్నోళ్లని అర్ధమయ్యే అవకాశం కనిపించడం చేత ప్రచురణ నిలిపానండి … కావాలంటే మీరు రచయితగారితో మాట్లాడండి అని ముగించాడు. అంతట నాయకుల వారు …
రచయితను పిలిపించెను … వచ్చిన రచయితను ఏమి రచయితా ఇటుల వ్రాసితినీ అని ప్రశ్నించెను.
నేను వ్రాసిన దాంట్ల తప్పేమి కలదో నాకు అర్ధం కావడం లేదు అని రచయిత జవాబు చెప్పెను.
అది ఏమి? ఆ భూస్వామి పాలేరును అంత గౌరవముగా పిల్చునా? అని అడగగా …
అప్పుడు రచయిత చెప్పిన జవాబుకు సదరు నాయకునకు ఎక్కిన పిచ్చి నేటి వరకు దిగలేదు …
రచయిత ఏమి చెప్పెననగా ..
నేను రైతు పక్షపాత రచయితను … రైతును ఒరే అనీ ఏక వచనంలోనూ సంబోధించానికి నేను వ్యతిరేకిని …
కనీసం నేను వ్రాసే రచనల్లో అయినా రైతును గౌరవ ప్రదంగా చూపించాలనుకున్నాను.
అందులకే అటుల వ్రాసితిని … ఇక నేను కమ్యునిస్టును కనుక భూస్వామ్య వ్యతిరేకిని మాత్రమే కాదు . రైతులు ఎటుల భూస్వాములను తిట్టవలెనని నేను భావించెదనో అటులనే పాలేరుతో మాట్లాడించితిని …
ఇది తప్పా వర్గ స్పృహ లేకపోవుటయా? అని గర్జించెను .
ఆ మాటలకు పోయిన మతి సదరు … నాయకుడికీ ప్రచురనకర్తకూ నేటికీ రాకున్నది …
ఏమి చేయవలెనో ఏమో తెలియకున్నది.